المقادير:
4 بيضات
2 خميرات الحلوى
1 لاباني
6 معالق كبار عامرين مزيان دقيق /فورص/
2 معالق كبار عامرين مزيان كاوبيل/ ممكن نستعملو بودرة الكاكاو فبلاصة كاوبيل
كاس صغير سنيدة
كاس زيت /كاس صغيرو ادا كان ديال العنبة كاس الا ربع باش ما تجيش الكيكة مزيتة
كوكوط و زبدة باش ندهنوها و شوية الطحين باش نرشوه
دابا ندوزو للطريقة
ندهنو الكوكوط بالزبدة و نرشوها بالطحين و نحطوها جانبا
في اناء نديرو البيض و السنيدة و لاباني و نخلطوهم مزيان حتى تدوب سنيدة
و نزيدو الزيت و نخلطو مزيان
عاد نزيدو الطحين و كاوبيل و الخميرة و نحركو حتى يتجانس الخليط
نكبوه فالكوكوط و نسدوها و ما نديروش الصفارة
نديروها فوق البوطة على نار مهيلة بزاف يعني ننقصو البوطة على حدها
نخليوها من 20 حتال 30 دقيقة تقريبا على حسب البوطة كاين لي واخا كتنقصها مزيان كتبقى مجهدة شوية
المهم منين نشوفو دخان ابيض خرج من بلاصة الصفارة نعرفوها طابت و نطفيو عليها
ادا بغينا الكيكة تجينا متقوبة من الوسط بحال ديال المول ناخدو قرعة الكونفيتير و ندهنوها بالزبدة و نرشوها بالطحين و نحطوها فوسط الكوكوط عاد نكبو الخليط
القرعة راها ما كاتتهرسش
بعد المرات كنلقاوها تحرقات شوية من لتحت ماشي مشكل نكرطوها بشوية بالموس
ندوزو للشكل الاول
كيكة الكوكوط
2 معالق كبار عامرين مزيان كريم باتيسيير
2 معالق كبار سنيدة
2 شكلاطات
نقسمو الكيك على جوج
فكاسرونة نديرو الحليب ونضيفو ليه السنيدة و الكريم باتيسيير عاد نديروه فوق البوطة يتغلى و نبقاو كنحركو حتى يغلى و يختارنديرو شوية وسط الكيكة
و نرجعو النصف الفوقاني
و نكبوالباقي فوق الكيكة و نحاولو نزلوه شوية من الجناب
نحكو الشكلاط فوق الكيكة و نمسحو جناب الطبسيل و ندخلوها للثلاجة حتى تبرد
الشكل الثاني
غادي نحتاجو
لتر حليب
2 فلان النكهة لي كتعجبكم/ انا هنا استعملت فلان الفريز
2 معالق كبار عامرين مزيان كريم باتيسيير
2 معالق كبار سنيدة
2 فريزات
جوج بانانات
ناخدو كيكة الكوكوط نقطعوها مورصوات و نستفوها فمول ديمونطابل يعني هاداك لي كايتحل
فكاسرونة نديرو الحليب بارد و نضيفو ليه الفلان و السنيدة و ادا كان الفلان حلو بلاما نزيدو سنيدة
و نديروه فوق البوطة و نحركوه حتى يغلى و نكبوه فوق الكيكة
واخا تشربو الكيكة ماشي مشكل
نديروها فالثلاجة تبرد بينما نوجدو الكريم باتيسيير
فكاسرونة نديرو الحليب ونضيفو ليه السنيدة و الكريم باتيسيير عاد نديروه فوق البوطة يتغلى و نبقاو كنحركو حتى يغلى و يختار
بحال ادا كانصاوبو لفلان منين يغلى نطفيو عليه
و نكبوه فوق الكيكة من بعد ما برد الفلان و شد راسو
نرجعوها للثلاجة
نقطعو البانان دوائر و نعصرو عليه الحامض باش ما يكحالش
من بعد ما تبرد الكيكة نخرجوها من الثلاجة و نزينوها
نديرو الفريزة الوسط 
ليست هناك تعليقات:
إرسال تعليق